Giaprobahan na sa House Committee on Ways and Means ang balaodnon nga magtugot sa Presidente sa pag-suspinde sa excise tax sa produktong petrolyo.
Tumong niini nga mapanalipdan ang katawhan gikan sa nagkagrabe nga epekto sa mahal nga lana.
Ubos sa maong balaodnon, mamahimong ipatuman ang suspensyon kung ang average nga presyo sa Dubai Crude Oil moabot sa $80 kada bariles.
Apan sa wala pa kini maaprobahan, nag himong init ang panaghisgot sa joint meeting sa Committee on Energy ug Committee on Trade and Industry.
Gibutyag ni Manila Representative Rolando Valeriano ang iyang kabalaka ug gikuwestiyon ang paspas nga pagsaka sa presyo sa mga oil companies, samtang hinay kini kon dunay bawas-presyo.
Sa laing bahin, gipasalig ni Energy Secretary Sharon Garin nga andam na ang contingency plan sa gobyerno.
Kini aron matubag ang bisan unsang posible nga kakuwang sa suplay o grabeng pag-ulbo sa presyo sa lana sa pandaigdigang merkado.
Sa pagkakaron, isumite na ang maong panukala sa plenaryo sa Kamara alang sa pinal nga deliberasyon sa dili pa kini hingpit nga mahimong balaod