Dili angay mabalaka ang mga konsumidor ug mag-uuma sa Northern Mindanao sa importation ban sa bugas nga nagsugod niadtong Septiembre 29, 2025.
Sa eksklusibong pakighinabi sa Bombo Radyo Malaybalay atol sa Programang Bombohanay Bigtime kay Apollo Pacamalan Regional Executive Director sa Department of Agriculture (DA) Region X nga bastante ang supply sa bugas sa rehiyon tungod sa kusog nga produksyon ug suporta sa National Food Authority (NFA).
Saysay pa ni Pacamalan nga adunay sugyot si DA Secretary Francisco Laurel nga i-extend ang importation ban hangtud sa Disyembre aron mas mapaayo ang lokal nga produksyon sa bugas sa tibuok nasud.
Gipahibalo usab ni Pacamalan nga sa Northern Mindanao kapin sa 20,000 ektarya nga harbisonon nga bugas ug igo na kaayo kini sa panginahanglan sa rehiyon.
Ilabi na karon nga apil na ang National Food Authority (NFA) sa pagtabang sa supply sa bugas nga adunay bag-ong bodega sa Maramag, Bukidnon gawas pa sa bodega nga naa sa Aglayan, Malaybalay City.