Misulod sa peligro ang daghang motorista sa Bukidnon tungod sa sunod-sunod nga disgrasya sa kalsada.
Natala una ang aksidente di palang dugay sa Purok-5, Barangay Dalwangan, Malaybalay City diin nalambigit ang usa ka Yamaha XTZ nga motorsiklo ug Wing Van truck. Base sa inisyal nga imbestigasyon, padulong sa sentro sa siyudad ang duha ka sakyanan ug misulod sa inner lane ang truck nga wala mabantayi sa motorsiklo, hinungdan sa bangga. Nakaangkon og pilas ang drayber sa motor apan luwas na ang kahimtang human madala sa balay tambalanan.
Sa laing disgrasya usab nahitabo sa Barangay San Jose sa samang adlaw diin kritikal ang kondisyon sa drayber sa motorsiklo nga kasamtangang gitambalan. Samtang, duha ka menor de edad ang naangol sa aksidente nga nahitabo pasado alas 10:00 sa gabii, niadtong milabayng adlaw, sa Bonifacio Street, Purok 6, Don Carlos. Giingon nga ang 15-anyos nga drayber ug 12-anyos nga backrider misakay sa motorsiklo nga walay headlight ug nakabangga sa usa ka KIA Grand Sportage sa intersection.
Daling gidala ang duha sa balay tambalanan aron mahatagan sa medikal. Padayon karon ang imbestigasyon sa kapulisan sa tanan nga aksidente ug nagpahimangno sa publiko nga magbantay sa dalan aron malikayan ang dugang kaswalti.Â