Gikumpirma ni Senate Ad Hoc Committee chairperson Sherwin Gatchalian nga magpahigayon sa una nga pagdungog ang Senate Ad Hoc Committee sa Martes, Marso 24, kabahin sa epekto sa nagkagrabeng tensyon sa Middle East sa nasud.
Sumala ni Gatchalian nga susihon sa komite kung igo ba ang pondo sa General Appropriations Act 2026 aron matubag ang epekto sa krisis nga naggikan sa tensyon tali sa United States, Israel, ug Iran.
Dugang pa niini, nga sa ika-22 ka adlaw sa gubat, angay nga adunay andam nga lakang ang gobyerno aron matabangan ang mga direktang apektado sama sa mga driver ug motorista nga naapektuhan sa pagsaka sa presyo sa lana.
Gidugang pa sa senador nga posibleng maapektuhan usab ang food security tungod sa posible nga pagsira sa Strait of Hormuz, nga usa ka importante nga ruta sa kalibutang kalakalan sa lana, natural gas ug abono.
Tungod sa kabug-at sa sitwasyon, gipahigayon ang pagdungog bisan pa man sa break sa Kongreso panahon sa Holy Week.
Gikinahanglan usab nga magsumite ang mga ahensya sa gobyerno sa ilang contingency plans aron maandam ang nasud sa posibleng worst-case scenarios.
Samtang, gisugyot usab ni Gatchalian ang pagtipid sa gobyerno pinaagi sa pagminus sa work travel, pagbalhin sa online training, ug paglimit sa representation expenses, nga posibleng makatigom og hangtod ₱90 bilyon.