Hugot nga nipalag si Senadora Imee Marcos sa paglambigit sa iyang mga kaubang senador sa kontrobersiya sa maanomalyang flood control projects, samtang direkta niyang gitumbok ang iyang ig-agaw nga si kanhi Speaker Martin Romualdez nga maoy tinuod nga utok sa maong isyu.
Sa iyang pamahayag, gikuwestiyon sa senadora kon ngano nga ang mga sakop sa Senado ang gipuntirya sa imbestigasyon. Gitawag usab niya si Romualdez og “Bonjing” ug giinsistir nga ang opisina niini ang sinugdanan sa tanang mansa sa korapsyon sa flood control fund.
Dugang pa ni Marcos, sigurado na ang pagpasaka og kaso batok sa pipila ka senador sa sunod nga semana. Matud niini, nakita na niya ang draft resolution nga nagtakda sa pagpasaka sa kaso karong Enero 15.
Lakip sa mga personalidad nga gihisgutan sa maong dokumento nga posibleng mag-atubang og kaso mao sila si Sen. Joel Villanueva, Sen. Jinggoy Estrada ug kanhi Sen. Bong Revilla.Kasamtangan, wala pay opisyal nga tubag ang kampo ni Romualdez ug ang mga nahisgutang senador may kalabutan sa maong mga pasangil.