Giduso ni Senador Imee R. Marcos ang dinaliang pagpasar sa usa ka balaodnon nga nagtumong sa paghatag og kahupayan sa mga Pilipino pinaagi sa pagminus sa buhis.
Kini nga lakang gihimo aron mamenosan ang grabeng epekto sa nagpadayong krisis sa lana nga maoy hinungdan sa pagsaka sa presyo sa mga paliton sa nasud.
Ubos sa maong balaodnon, gitinguha sa senador nga isaka ang income tax exemption ngadto sa ₱500,000 gikan sa kasamtangang ₱250,000 nga tinuig nga kita.
Dugang pa niini, gipangayo usab ni Marcos ang pagpataas sa ceiling sa mga bonus, lakip na ang 13th month pay ug uban pang benepisyo nga dili mabuhisan, ngadto sa ₱200,000 gikan sa kasamtangang ₱90,000.
Sumala sa senador, gikinahanglan kini nga lakang aron mas dako ang maiuli nga kita sa matag trabahante nga Pilipino aron aduna igong ikagasto sa pagsaka sa presyo sa mga paliton.
Gipasiugdahan ni Marcos nga kung dili kayang kontrolon sa gobyerno ang sitwasyon sa krisis, kinahanglan nga masigurado nga maprotektahan ang kinitaan sa katawhan alang sa ilang inadlaw-adlaw nga panginahanglan.