Subling nagka-initay sa plenaryo sa Senado si Senador Panfilo Lacson ug Senador Rodante Marcoleta human sa pagsaway ni Marcoleta kalabot sa kakuwang sa opisyal nga committee report hangtod sa kasamtangan, nunot sa serye sa mga gipahigayong pagdungog sa Senate Blue Ribbon Committee labot sa mga anomalya sa flood control projects sa nasod.
Sumala pa ni Lacson, nahatagan na og inisyal nga report ang matag senador, diin ang matag usa adunay kaugalingong kopya nga dunay watermark sa ilang tagsa-tagsa ka opisina.
Gihimo matud pa kini sa iyang buhatan aron malikayan ang nahitabong pag-leak sa inisyal nga report sa komite kaniadto.
Isip tubag, gipahayag ni Marcoleta nga adunay pipila ka kakulangan ang report sa komite ni Lacson, partikular na ang pagkawala sa mahinungdanong mga ngalan sama ni Adrian Bersamin, kinsa kanhi nagsilbi isip Undersecretary ug leader sa Presidential Legislative Liaison Office (PLLO). Gihisgotan usab ni Sen.
Marcoleta ang giingong pagpamugos sa mga kaubang senador, sama ni Sen. Panfilo Lacson, nga nagpasangil kaniya nga siya usa ka “pro-China.”.
Sa panag-engkwentroni Lacson ug Marcoleta sa plenaryo sa Senado, gipahayag ni Marcoleta nga magpatawag kini og usa ka pagdungog karong Marso 12 kalabot sa isyu sa West Philippine Sea ug sa utlanan sa teritoryo sa Pilipinas sa ginabangi nga kadagatan.
Lakip sa mga gidapit mao ang mga indibidwal gikan sa National Mapping and Resource Information Authority (NAMRIA), Philippine Coast Guard, Philippine Navy, ug uban pang inilang personalidad sama ni kanhi Justice Antonio Carpio.
Apan sa dihang gipangutana ni Lacson ang chairman sa Senate Committee on Foreign Relations nga si Erwin Tulfo, gipahayag ni Tulfo nga dili makatambong ang maong mga ahensya.
Tungod niini, gipasabot ni Lacson nga ‘gikompirma ni Marcoleta ang usa ka butang nga wala pa gani makompirma.’