Gipasiugda ni DPWH Sec. Vince Dizon ang kahinungdanon sa usa ka independenteng imbestigasyon may kalabotan sa mga isyu sa flood control projects sa ahensya.
Gipasiugda pag-usab ni Department of Public Works and Highways (DPWH) Secretary Vince Dizon ang kahinungdanon sa usa ka independent ug walay gidapigan nga imbestigasyon kabahin sa mga isyu sa mga proyekto sa flood control sa ilang ahensya.
Taliwala sa mga alegasyon sa anomalya ug sayop nga alokasyon sa pondo, giinsistir ni Dizon nga mas angay ang lawom nga pagsusi sa usa ka gawasnong grupo sa mga proyekto aron mabalik ang pagsalig sa publiko.
Atol sa usa ka pagdungog, gipadayon ni Rep. Edgar Erice ang pagpangutana bahin sa status sa internal investigation nga gisugdan na sa DPWH bisan wala pa ang panawagan alang sa independent probe.
Matod ni Erice, importante nga masayran kung unsa ang resulta sa maong imbestigasyon ug kung adunay mga opisyal o proyekto nga napamatud-an nga adunay kakulangan o kalapasan.
Gidugang pa ni Erice ang pangutana kung unsa ang iprayoridad sa DPWH, ilabi na karon nga nagkinahanglan og overhauling sa gi-propose nga pondo alang sa flood control programs.
Base sa mga nakuha nga datos sa ilang review, adunay mga proyekto nga naapil sa bag-ong budget proposal bisan human na kini sa dugay na nga panahon, nga naghatag og kabalaka sa posibleng double funding ug dili epektibo nga paggamit sa pondo sa gobyerno.