Gipalapdan sa mga otoridad ang search and rescue operations human sa trahedyang pagkahugno sa dalan sa Quezon, Bukidnon, diin duha ka tawo ang gituohang nadani samtang nagsakay sa ilang bao-bao. Sumala sa pakighinabi sa Bombo Radyo Malaybalay ngadto kang Forts Cabarde, Public Information Officer sa Quezon, Bukidnon, padayon ang operasyon ug gilauman nga makaplagan na ang mga lawas sa magtiayon human makit-an ang ilang tsinelas ug ang ilang bao-bao.
Ang duha giilang sila si Ely ug Thelma Ubatay, mga residente sa Purok 9, Kahusayan, Kitaotao, Bukidnon, nga nawad-an og kontak human sa pagkahunlak sa Bukidnon–Davao Road sa Sitio Kipolot, Barangay Palacapao, Quezon, niadtong Oktubre 18, 2025, pasado alas-9 sa gabii.
Dugang pa sa pagsaysay ni Cabarde, gibati sa mga otoridad ang kasubo sa nahitabo sa magtiayon, ilabi pa nga kining duha nakalingkawas sa trahedya niadtong Oktubre 15, 2024, diin natabunan patay ang ilang anak ug apo human sa landslide. Gikasubo kining maong kahimtang karon nga sila na usab ang biktima sa laing landslide.
Sa maong operasyon sa otoridad gisuspende ang operasyon alas-5 sa hapon ug pagabalikon sa alas-6 sa buntag. Nanghinaot usab si Cabarde nga madungagan ang mga personahe aron mapadali ang pagpangita niini.
Sa pagkakaron, dili pa maagian ang Davao–Bukidnon Road, apan gipasabot ni Cabarde ang alternatibong agianan alang sa mga biyahero. Ang mga light vehicles mahimong moagi sa San Fernando–Kalanganan Road paingon sa Tagum City, samtang ang mga heavy vehicles kinahanglan moagi sa ruta Maramag–Don Carlos–Carmen–Midsayap–Digos padulong sa Davao City.