Sa panahon nga halos laptop, tablet, ug smartphone na ang gigamit sa eskwelahan ug trabaho, nadiskobrehan sa University of Tokyo nga mas epektibo ang tradisyonal nga pagsulat sa papel.
Sumala sa neuroscientist nga si Prof. Kuniyoshi L. Sakai, mas kusog ang brain activity ug mas paspas ang recall sa impormasyon kung kini isulat sa pisikal nga papel tandi sa digital devices.
Sa ilang eksperimento sa 48 ka volunteers, napakita nga 25% mas paspas makahuman ang migamit og papel ug ballpen kumpara sa migamit og gadgets.
Dugang pa, pinaagi sa MRI scans, nakita nga mas aktibo ang hippocampus, kini bahin sa utok nga responsable sa memorya ug nabigasyon sa mga migamit og ballpen ug papel.
Giklaro sa mga eksperto nga ang papel naghatag og spatial details sama sa texture, mga tupi, ug lain-laing stroke nga nagsilbing trigger aron mas dali mahinumduman sa utok ang impormasyon.
Sa laing bahin, ang digital screens kasagaran pare-pareho ug uniform, ug mawala ang spatial permanence tungod sa pag-scroll o pagsira sa app.
Busa, tambag sa mga tigpanuki-duki nga mugamit og notebook kon nagtuon o naghimo og creative works sama sa pagsulat ug sining.