Gibasura sa Sandiganbayan ang hangyo ni kanhi Senador Ramon “Bong” Revilla Jr. nga dili na ihilakip o pa-inhibit si Associate Justice Karl Miranda sa pagdungog sa iyang kasong malversation tungod sa kakuwang sa lig-on nga basehan. Ang maong kaso may kalabotan sa giingong ₱92.8 milyones nga “ghost flood control project” didto sa Pandi, Bulacan.
Matod sa anti-graft court, katungod ug obligasyon ni Justice Miranda nga ipadayon ang paghupot sa kaso. Una nang gihangyo sa kampo ni Revilla ang pag-atras sa mahistrado tungod kay ang igsoon niini nahimong abogado sa usa ka state witness, apan gipasabot sa korte nga ang pag-inhibit nga walay klarong pruweba sa pagdapig o personal nga interes makadaot lamang sa dagan sa hustisya. Tungod niini, pormal na gibasura sa Sandiganbayan ang mosyon ni Revilla tungod sa kakuwang sa merito.