Gipasalig sa Department of Justice (DOJ) nga manubag sa balaod ang mga napiling state witness sa kaso sa flood control kon ilang bawi-on o i-recant ang ilang testimonya bahin sa kontrobersiya.
Sumala ni Justice Secretary Fredderick A. Vida, pasakaan og kaso ang mga testigo kon mahitabo ang recantation gumikan supak kini sa mga kondisyon nga ilang gisabutan ubos sa Witness Protection Program (WPP).
Bisan pa sa mga balita mahitungod sa posibleng recantation, giklaro ni Sec. Vida nga sa karon wala pa’y opisyal nga kumpirmasyon niini.
Naglaum gihapon ang DOJ nga magpadayon ang mga state witness ug motestigo sa korte kon pormal nang ipasaka ang mga kaso.
Gisiguro usab sa DOJ nga kon adunay recantation, dili na mabawi ang kwarta nga nauli na sa gobyerno.
Ang milyon-milyong restitution money nga boluntaryong giuli sa mga testigo magpabilin sa panag-iya sa estado.
Matod sa DOJ, kapin ₱300 milyon na ang kinatibuk-ang kantidad sa restitution money nga nakolekta ug na-turn over gikan sa mga maanomalyang flood control projects.