Gipasaka na ang ikatulong impeachment complaint batok kang Vice President Sara Duterte sa House of Representatives.
Ang reklamo gisang-at sa grupo sa mga pari, madre, pastor, ug abogado, ug giendorso ni Rep. Leila de Lima, nga siya usab ang miendorso sa ikaduhang impeachment complaint.
Sumala ni De Lima, wala’y balaod o lagda sa Kamara nga nagbawal sa usa ka mambabalaod sa pag-endorso og labaw sa usa ka impeachment complaint.
Gituohan niya nga lig-on ang ebidensya, lakip ang audit findings, liquidation documents, ug testimonya sa mga kanhi empleyado sa OVP.
Matod sa legal counsel sa complainants nga si Atty. Amando Ligutan, ang mga pareklamo naglakip sa culpable violation of the Constitution, betrayal of public trust, plunder, malversation, graft and corruption, bribery, ug uban pang seryosong krimen.
Ang kaso nakasentro sa giingong iregularidad sa paggamit sa ₱612.5 milyon nga confidential funds sa OVP ug DepEd, lakip ang paggamit sa mga pekeng pangalan sa liquidation documents.
Sumala usab sa complainant nga si Father Joselito Sarabia, ang pagsumite sa reklamo dili lang legal nga isyu kondili usa usab ka moral nga obligasyon alang sa mga relihiyoso, ug oportunidad kini para sa Bise Presidente nga magpasabot ug mudepensa sa mga alegasyon.
Ang sunod nga lakang, ipasa ang reklamo sa Office of the Speaker aron masulod sa hisgutanan sa Kamara sumala sa ilang mga lagda.