Giaprobahan na sa Sangguniang Panlungsod ang resolusyon alang sa interposing of no objection sa intensyon sa Hanabana Construction and Equipment Corporation nga mag-operate ug magdumala sa Level III Water System sa syudad sa Malaybalay.
Sa eksklusibong pakighinabi sa Bombo Radyo Malaybalay kang Ramonito N. Sagocsoc, Vice-President sa Hanabana, gipadayag niini nga anaa sa P200 milyon ang gi-propose nga inisyal nga pondo aron matabangan sa pagsulbad ang dugay nang problema sa panubig sa syudad.
Matud ni Sagocsoc, dugay na kining proposal panahon pa nga wala pa misugod ang Primewater Infrastructure Corporation, apan mao kini ang napili nga magdumala, apan tungod sa kakulangan sa serbisyo, subling nakig-koordinar ang Hanabana.
Gipasabot ni Sagocsoc, nga dili ang suplay sa tubig ang problema tungod adunay kasaligan nga source sa bulk water, apan ang kakulang sa pasilidad ug imprastruktura maoy nagpadayon nga hagit.
Gikaingong plano sa Hanabana, nga muserbisyo sa mga barangay nga kulang o wala pa’y distribusyon sa tubig ug musuplement lamang sa kakulangan sa Primewater.
Gipasabot usab nga magpabilin gihapon ang presensya sa Primewater gumikan ang Hanabana independenti ang distribution network ug dili ilawom sa joint venture.
Matud pa ni Sagocsoc, nagkulang ang kasamtangang sistema sa pag-develop sa mga water sources ug sa non-revenue water (NRW) management.
Gibanabana nga ang kapasidad sa Hanabana mokabat og 5,000 cubic meters o 5 milyon litros matag adlaw nga makaserbisyo sa 7,000 ka panimalay.
Dugang pa niini, nga ang mga konsumidor nga makakonektar sa ilang linya magbayad sa P30 matag cubic.