Nagpabilin nga gipakaylap sa Japan ang mga tsunami advisories human miigo ang magnitude 7.5 nga linog sa Northern Japan.
Ang linog miigo sa baybayon sa Aomori Prefecture alas 10:15 sa gabii sa oras sa Pilipinas sa giladmon nga 54 kilometros.
Ang linog unang gitaho nga magnitude 7.6 apan gipaubos kini sa magnitude 7.5 sa Japan Meteorological Agency.
Nagpabiling gipaguwa ang mga advisory sa tsunami sa mga bahin sa Aomori Prefecture, Iwate, Miyagi ug Fukushima prefecture.
Tungod niini, giawhag sa mga otoridad ang mga residente nga nagpuyo sa mga baybayon nga mobakwit tungod sa hulga sa pagtaas sa lebel sa tubig dagat.
Samtang ang mga residente sa daghang mga lungsod sa Hokkaido ug ang rehiyon sa Tohoku gipabakwit usab tungod sa maong linog.
Sa laing bahin, gipaniguro usab sa Tokyo Electric Power Company, nga wala’y mga abnormalidad nga natala sa Fukushima Daiichi ug Daini nukleyar nga mga planta.