Gidayeg sa mga hurado ug mga tumatan-aw ang Filipino singer nga si Matty Juniosa sa usa ka iladong British talent show human sa iyang audition nga nakakuha og standing ovation.
Giawit sa 27-anyos nga mag-aawit ang kantang “Purple Rain” ni Prince, nga miresulta sa kusog nga pakpak gikan sa audience ug usa ka Golden Buzzer gikan sa inilang hurado nga si Simon Cowell. Tungod niini, diretso na siyang makasulod sa live shows sa maong kompetisyon.
Sa wala pa ang iyang audition, gipangutana si Matty sa judge nga si Alesha Dixon kon unsa ang iyang pangandoy. Nitubag si Matty nga gusto niya mahimong usa ka sikat nga world performer, apan giangkon usab niya ang iyang kahadlok sa kapakyasan tungod sa mga nangaging sinalmotan nga singing competitions.
Kahinumduman nga niadtong 2019, nisalmot siya sa Idol Philippines diin natapos siya sa Top 12.
Natingala usab si Simon Cowell sa reaksyon sa mga tumatan-aw ug miingon nga kini ang usa sa pinakadako nga reaksyon nga ilang nadawat sa maong show. Dayon, gidayeg usab siya sa iyang mga kaubang hurado nga sila Amanda Holden ug KSI, kinsa nakadayeg sa iyang tingog, presensya sa entablado, ug sa iyang masiyahon nga personalidad.
Sa pagkakaron, nanimuyo si Matty sa Glasgow, United Kingdom, diin nagtrabaho siya isip part-time waiter samtang gipadayon ang iyang pangandoy sa musika.
Natawo siya sa Pilipinas ug nagdako sa nagkadaiyang dapit sama sa Quezon City, Mandaluyong, ug uban pang bahin sa nasod. Nahimo usab siyang miyembro sa singing group nga iDolls human sa Idol Philippines, apan nabungkag kini niadtong 2022 sa dihang nidesisyon siyang mobalhin sa United Kingdom aron magtuon og Musical Theater sa Royal Conservatoire of Scotland.
Bisan pa man sa mga hagit sa kinabuhi, lakip na ang mga kapakyasan sa kompetisyon ug ang pagbalhin sa laing nasod, padayon nga gipakita ni Matty Juniosa ang iyang dedikasyon ug kadasig aron makab-ot ang iyang damgo nga mahimong usa ka world-class performer.