Nakahatag og dakong inspirasyon ang 22-anyos nga si Rolan Popatco Jr. human kini malampusong nakapasar sa March 2026 Medical Technologist Licensure Examination, diin ang nahimong labing unang Aeta nga lisensyadong medical technologist sa Pampanga.
Gikumpirma sa Provincial Social Welfare and Development Office ang maong garbo nga nakab-ot ni Rolan, kinsa dako og pasalamat sa mga scholarship gikan sa kagamhanan nga nakatabang kaniya sa paghuman sa kursong Bachelor of Science in Medical Technology.
Bisan pa man sa mga hagit sa kinabuhi ug pagpaningkamot isip SK Chairman dungan sa iyang pag-eskwela, wala kini nakapugong sa iyang kadasig tungod sa tinguha nga moalagad sa iyang komunidad sa kabukiran.
Sa pagkakaron, nangita si Rolan og dugang scholarship aron makapadayon sa pagtungha sa medisina ug makab-ot ang iyang damgo nga mamahimong usa ka doktor sa umaabot.