Gilauman sa kasundaluhan nga magmabungahon ang pagpahigayon sa Philippine-Australian Army-to-Army Exercise (PAAAE) Kasangga 2025 – 01. Sa pakighinabi sa Bombo Radyo Malaybalay Bukidnon kang Major Patrick Martinez, tigpamaba sa 4 infantry Diamond Division Philippine Army nga ang pakig alayon sa Austarlian Defense Force naglakip sa Wisdom of Operations, Power Technologies, ug lain-laing mga joint training exercises nga nagpalig-on sa kapasidad sa mga sundalo sa pag-atubang sa mga hulga sa seguridad.
Ang hinungdan sa maong kolaborasyon mao ang pagpalig-on sa territorial defense operations, nga tumong nga mas mapalapad ug mapalig-on pa ang internal security capabilities sa nasud. Gituohan kini nga usa ka taktikal nga lakang aron andam ang pwersang militar sa mga dagkong operasyon sa umaabot. Ang maong panag-uban nagpakita sa kalig-on nga relasyon tali sa Pilipinas ug Australia sa natad sa seguridad ug depensa.
Katibuk-ang 90 ka personahe gikan sa 1st Combat Engineer Regiment, Australian Army; ug 140 Philippine Military personnel gikan sa 4th Infantry (Diamond) Division (4ID), 10th Infantry (Agila) Division (10ID), ug 504th Combat Engineer Battalion (504CEB) ang milangkob sa maong military exerxise nga gipahigayon sa Camp Kibaritan, Kalilangan, Bukidnon diin kini mulungtad hangtud sa Hunyo 24 ning tuiga.