Nagdeklara si Presidente Ferdinand Marcos Jr. og state of national calamity tungod sa kadakong kadaot nga gidala sa bagyong Tino (international name: Kalmaegi) ug alang usab sa preparasyon batok sa umaabot nga super typhoon nga si Uwan.
Matod sa Pangulo, tungod sa kadaghan sa mga lugar nga naapektuhan ni Tino ug maapektuhan pa ni (Typhoon) Uwan, adunay sugyot ang NDRRMC nga giuyonan niini nga magdeklara ta og national calamity.
Dugang pa sa Pangulo nga magpadayon ang tabang alang sa mga biktima sa bagyong Tino, samtang gimandoan ang tanan nga ahensya sa gobyerno nga maghimo og hugot nga preparasyon alang sa pag-abot ni Typhoon Uwan.
Sumala sa Pangulo, daghang rehiyon nga anaa sa 10 hangtod 12 ka rehiyon ang posibleng maapektuhan.
Tungod sa pagdeklara sa national calamity, mas dali nang magamit ang emergency funds para sa relief, rehabilitation, ug recovery efforts sa mga apektadong lugar.
Mahimo na usab ipahamtang ang price control sa mga batakang produkto ug paspas ang pagdeploy sa national government assistance.
Samtang, ang usa ka tropical depression nga anaa pa sa gawas sa Philippine Area of Responsibility (PAR) gilauman nga mo-landfall sa Cagayan ug makapaapekto pag-ayo sa Luzon sa umaabot nga semana.
Ang bagyong Uwan, nga mao na ang ika-21 nga bagyo nga mosulod sa nasud karong tuiga, posibleng mahimo og super typhoon sumala sa weather bureau.
Sumala sa Pangulo, ang mga team sa national government, military, ug kapulisan nagpabiling naka-deploy sa mga lugar nga grabe og kadaot aron makahatag og tabang, lakip na ang pag-ayo sa kuryente ug komunikasyon, ug paglimpyo sa mga kalsada nga natabunan sa debris ug landslides.
Gipasabot usab sa Presidente, nga magpadayon ang relief operations sa mga apektadong lugar, samtang andam na usab ang mga preemptive measures alang sa posibleng epekto ni Uwan.