Andam si Presidente Ferdinand Marcos Jr. nga sertipikahan nga urgent ang sugyot nga emergency powers kalabot sa fuel excise tax sa higayon nga masumite na sa Kongreso ang committee report niini.
Matod sa Pangulo, walay pulos nga ideklarang urgent dayon ang sugyot kung wala pa mahuman ang report sa komite, gumikan ang pagpadali sa proseso magsugod lamang sa plenary debates.
Gipasabot niini, nga kung ideklarang urgent ang usa ka sugyot, mahimong mapamub-an ang panahon tali sa pagpresentar sa committee report ug sa paghisgot niini sa plenaryo, ug posible usab nga diretso na kini sa ikatulong pagbasa kon gikinahanglan.
Dugang pa ni Pangulong Marcos, simple lamang ang gipangayo sa Malacañang, nga mahimong gamiton sa Pangulo ang emergency powers kung ang presyo sa lana molapas sa $80 kada bariles sulod sa usa ka bulan nga average.
Giklaro usab sa Pangulo nga dili kini pasabot nga awtomatikong gamiton ang maong gahum, kondili hatagan lamang siya og opsyon nga buhaton kini kung gikinahanglan.