Narekober na ang patay’ng lawas sa magtiayong biktima sa landslide nga nahitabo sa Overview, Sitio Kipolot, Barangay Palacapao, Quezon, Bukidnon.
Ang mga patay’ng lawas nakalot pasado alas 9:31 sa buntag karong Oktubre 23, 2025, sa maong landslide site.
Gikumpirma kini mismo sa pamilya ang identidad sa mga biktima. Base sa gikatahong impormasyon gikan sa PDRRMO, sa ika-lima ka adlaw sa padayong pagpangita, nakaplagan ang mga lawas inabagan sa mga Search and Rescue (SAR) dogs sa 10th Infantry Division pinaagi sa paggamit sa mga backhoe alang sa pagkalot nga miabot sa 12 feet ang kalawom.
Si Ely Ubatay, ang lalaking biktima, adunay samad sa ulo, apan gipasabot nga wala pa kini sa kahimtang sa pagkadaot o state of decomposition ang mga lawas sa biktima.
Sa eksklusibong pakighinabi usab sa Bombo Radyo Malaybalay kang Forts Cabarde, Public Information Officer sa LGU Quezon, mipasabot nga migamit na sila og backhoe aron mapadali ang operasyon sa search and retrieval nga miresulta sa pagkakita sa maong mga biktima.
Samtang mipadayag usab ang pamilya sa mga biktima nga hinay-hinay na matud pa nilang nadawat ang maong panghitabo.
Kahinumdoman nga unang nadiskobrehan ang gisakyang bao-bao ug pipila ka personal nga gamit sa buntag sa Dominggo, Oktubre 19, 2025.