Gihulagway ni Atty. Ade Fajardo, abogado ni kanhi House Speaker Ferdinand Martin Romualdez, nga lohikal ug pisikal nga imposible ang mga alegasyon sa pipila ka testigo sa Senado batok sa iyang kliyente.
Matod ni Fajardo, mismong ang kontraktor nga si Curlee Discaya ang napanumpa nga mitestigo nga wala pa siya sukad nakasulod sa South Forbes Park, busa imposible nga didto siya nakigkita o nakadawat og mga mando. Gidugang niya nga ang mga pasangil naggikan lamang sa mga kanhi trabahante sa usa ka gipahawa sa puy-anan ug walay kaubang dokumentaryong ebidensya.
Sumala pa sa abogado, walay ngalan ni Romualdez sa bisan unsang deed, kontrata, o rekord sa bayad may kalambigitan sa maong kabtangan, ug gihulagway ang mga pamahayag sa mga testigo nga alyas “Joy” ug “Marie” isip hungingong ug walay igong basehan.