Gisiguro ni Presidente Ferdinand Marcos Jr. nga andam na ang gobyerno sa pagtubag sa bisan unsang panginahanglan sa mga apektado sa Bagyong Crising. Personal nga giinspeksyon sa Presidente ang bodega sa Department of Social Welfare and Development (DSWD) diin ginahimo ang repacking sa mga family food packs nga ipang-apod-apod sa mga apektado sa maong bagyo.
Matod sa Presidente, gigamit na karon og bag-ong makinarya ang pag-repack sa mga relief goods nga naglakip sa nagkalain-laing health kits, sanitary kits, family dress kits ug cooking set.Tungod sa bag-ong makinarya, mas paspas na ang pag-repack sa mga goods.Gipakita sab ni Presidente Marcos ang mga balde nga adunay water filter nga pwede gamiton sa pagtigom ug tubig.
Bisan ug hugaw ang tubig, kung maagi na sa filter mahimong luwas na kini imnon.Matod sa Presidente, dako kini’g tabang labi na panahong tingbagyo diin lisod makapangita og limpyo nga tubig tungod sa pagbaha.Sa pagkakaron, adunay kapin sa tulo ka milyon ka family food packs ang nakareserba.Gawas pa niini, adunay standby fund nga nagkantidad og P2.9 billion ang DSWD aron kung kinahanglanon pa og dugang pondo, adunay makuhanan.