Gipangayo karon ang hustisya sa pamilya sa usa ka Overseas Filipino Worker (OFW) nga gisunog patay sa iyang amo sa Riyadh, Saudi Arabia, human masayran nga wala’y koordinasyon sa pamilya kabahin sa kaso sukad pa sa pipila ka bulan, ug gihatagan lamang og 14 ka tuig nga pagkabilanggo ang suspetsado.
Base sa nakaylap nga impormasyon sa Bombo International News Correspondent nga si Necole Bedtao, gikan mismo sa mga igsoon sa biktima ang pahayag nga hangtod karon, wala pa silay nasayran nga kasayuran gikan sa mga awtoridad bahin sa kaso ug sa hustisya alang sa ilang igsoon. Gibutyag pa ni Bedtao nga walay klarong komunikasyon o pasabot sa pamilya may kalabotan sa desisyon nga 14 ka tuig ra ang silot sa amo nga responsable sa pagpatay.
Kahinumduman nga ang biktima gisunog patay sa iyang amo niadtong miaging Disyembre. Human sa insidente, misurrender ang suspetsado ug giatubang ang kaso nga nagtapos sa paghukom kaniya sa limitadong silot.
Sa pagkakaron, pangayo sa pamilya ang hustisya ug naglaum nga mapatuman ang mas hustong silot lakip na ang death penalty alang sa suspetsado. Ang biktima gilubong niadtong miaging Enero, apan hangtod karon, hustisya gihapon ang ilang gitinguha.