Gipahibalo sa usa ka overseas Filipino worker (OFW) ang grabeng pang-abuso nga nasinati sa iyang mga kauban sa trabaho sa Saudi Arabia, lakip ang pagpanglugos, pisikal nga abuso, ug kakulang sa tabang gikan sa embahada sa Pilipinas ug mga ahensya nga gikatakdang moalalay kanila.
Sa pakighinabi sa Bombo Radyo Malaybalay, mipadayag si Nicole Bedtao, usa ka OFW sa Saudi Arabia, sa kaguol sa kahimtang sa iyang mga kaubang OFW. Matod niini, adunay Pilipinang gilapwahan ang likod, gi-rape, ug gipang-abuso pag-ayo apan wala’y gihatag nga hinabang gikan sa Philippine Embassy ug sa ahensya nga nagpadala kanila.
Gibutyag usab ni Bidtao nga bisan og gusto pa nila mangayo og tabang, lisod kini buhaton tungod sa kahadlok ug kakulang sa akses sa embahada.
Dugang pa niini, buta ug bungol ang embahada ug ahensya sa mga reklamo sa mga OFW. Gikundena niini ang walay aksyon sa mga opisina nga maoy mohatag og proteksyon sa mga Pilipino nga langyaw.
Sa pagkakaron, nagpadayon ang panawagan sa mga OFW alang sa mas aktibong pagpakabana sa gobyerno aron maprotektahan ang ilang mga katungod ug kaluwasan.