Mikabat na sa kapin 1,000 ka bag sa P20-per-kilo nga bugas ang napang-apod-apod sa probinsya sa Bukidnon, human malampusong naipatuman sa Department of Agriculture ang maong programa sa tanang 82 ka probinsya sa nasud.
Sa eksklusibong pakighinabi sa Bombo Radyo Malaybalay kang Glenn De Otoy, Information Officer sa National Food Authority kon NFA–Bukidnon, gibutyag niini nga anaa na karon ang P20-per-kilo nga bugas sa NFA-Bukidnon Redemption Center nga nahimutang sa Maramag Warehouse.
Gipalapdan usab ang coverage sa programa aron malakip na ang persons with disabilities, senior citizens, single parents, Indigenous Peoples, benepisyaryo sa 4Ps, lakip na ang tricycle ug pedicab drivers.
Matud pa ni De Otoy, kapin sa 200 ka benepisyaryo na ang nakabenepisyo sa maong programa sa unang hugna sa pagpatuman niini sa probinsya.
Sigon niini, ang mga senior citizen, PWDs, single parents, IPs ug 4Ps beneficiaries mahimong makapalit og hangtod 30 ka kilo sa bugas matag bulan, samtang ang mga mangisdaay ug mag-uuma gitugotan nga makapalit og 10 ka kilo matag bulan.
Gipahinumdoman usab sa NFA, nga kinahanglan magdala og balidong identification cards o sertipikasyon ang mga benepisyaryo sa pagkuha sa bugas.
Samtang ang sa mga mag-uuma, gikinahanglan nga adunay datos sa buhatan aron makumpirma ang ilang eligibility sa programa.