Naghatag sa kasayuran ang Philippine Anti-Corruption Commission (PACC) aron ipahimutang ang kalibog sa publiko may kalabotan sa giingong ghost flood control project sa Malaybalay City, nga misangpot sa kabalaka sa paggamit sa pundo sa katawhan.
Gipahibalo sa PACC nga ang ₱96.4 milyon nga flood mitigation project nga gireport sa “Isumbong sa Pangulo” nga nahimutang sa Purok 4 ug Purok 8, Barangay Linabo, dili ghost project kondili gi-relocate ngadto sa Linabo Bridge.
Ang pagbalhin gimando sa Barangay Resolution No. 32, Series of 2023, nga giaprubahan sa konseho niadtong Marso 14, 2023, human masuta nga ang Purok 8 nga dili flood-prone samtang ang Purok 4 ug Linabo Bridge pirmi nga apektado sa pagbaha lakip ang forced evacuation. Apan, nakit-an sa PACC nga wala ma-update ang billboard ug opisyal nga dokumento, hinungdan nga nagpadayag og kalibog ug nagduda ang publiko nga ghost project kini.
Mitug-an ang project manager nga usa kini ka sayop sa transparency ug nangayo ug pasaylo sa publiko, samtang gipanghimatuud nga nahuman ang proyekto sa bag-ong lokasyon.
Gipasiugda sa PACC nga ang proyekto tinuod ug nagserbisyo, apan ang kapakyasan sa pag-update sa rekord nakadaot sa pagsalig sa katawhan.
Gitambagan ang DPWH, kontraktor, ug mga barangay council nga siguruhon ang tukmang impormasyon sa matag proyekto aron malikayan ang kalibog ug masiguro ang accountability sa paggamit sa kwarta sa buhis.