Giingong usa ka dakong insulto sa mga konsumidor ang pamahayag sa Department of Trade and Industry (DTI) nga ang P500 budget igo na para sa Noche Buena sa usa ka pamilya nga adunay upat ka miyembro.
Matud pa ni Ray Talimio Jr., kanhing miyembro s Oro Chamber, Economic Development Committee RDC-X nga dili makatarungan ang pamahayag sa DTI kay klaro nga taas gihapon ang presyo sa pagkaon sa merkado busa dili makahatag og kalidad nga pagkaon ang P500 alang sa Pasko.
Saysay pa niini nga ang P500 posibleng mapaigo kung mga barato ra ang presyo sa pang noche buena apan dili kini kalidad nga pagkaon nga angay ipakaon sa pamilya sa kapaskuhan.
Gipasabot usab ni Talimio nga bisan pa og ubos ang natala nga inflation gikan Enero hangtod Oktubre 2025 nga anaa sa average nga 1.7 porsiyento mas ubos pa sa target nga 2–4 porsiyento sa nasud nagpabilin nga mahal ang pagkaon kung itandi sa uban pang panaliton.
Gipahimangnoan usab niini ang DTI nga susihon pag-ayo ang tinood nga presyo sa panaliton sa merkado ug dili pasanginlan ang mga konsumidor sa dili realistiko nga budget sa Noche Buena.