Mukabat sa P5.6 milyon ang kantidad sa illegal nga sigarilyo aang malampusong naharang sa Highway Patrol Group (HPG)-Bukidnon sa Diversion Road, Barangay Patpat, Malaybalay City, Bukidnon, kagahapong adlawa, samtang upat ka suspetsado ang nadakpan.
Matod pa ni PMaj. Neil Edward Retana nga nagpahigayon sila og joint operation kauban ang Regional Highway Patrol Unit (RHPU)-10, Malaybalay City Police Station, ug Criminal Investigation and Detection Group (CIDG)-Bukidnon. Sa maong operasyon nasuta niini ang duha ka Closed-Van Truck nga walay plaka sa luyo, ug didto nadiskobre ang muabot sa 140 ka Master Cases sa illegal nga sigarilyo.
Gipang-ila ang nadakpan nga suspetsado nga sila: alyas Al, 25 anyos, residente sa Jolo, Sulu; alyas Rahim, 43 anyos; alyas Romar, 33 anyos; ug alyas Amid, 26 anyos — pulos residente sa Zamboanga City. Matod pa sa impormasyon, gikan pa ang mga kontrabando sa Lanao del Norte ug i-deliver kini sa Tagum City, Davao del Sur.
Giturn-over na ang mga sigarilyo sa Bureau of Customs (BOC) sa Tagoloan, Misamis Oriental alang sa tokmang disposasyon samtang ang upat ka suspetsado nagpabilin sa kustodiya sa Malaybalay City Police Station ug mag-atubang og kasong paglapas sa Graphic Health Warnings Law.