Miresulta na ang unang adlaw sa botohan sa papal Conclave og hangtod sa karon, wala pa makapili og bag-ong Santo Papa ang mga kardinal.
Kapin tulo ka oras nga pagpahigayon sa unang botohan sa Sistine Chapel,alas-9 sa gabii sa oras sa Vatican ug sa pagbana-bana sa Italian Police, kapin sa 30,000 ka tawo ang nagpundo ug naghulat sa pag-awas sa aso nga magsilbing timaan nga duna nay napiling bag-ong Santo Papa.
Sa pikas bahin, mukabat matud pa sa million euros ang kantidad sa pagpili pa lamang og muhulip kang Pope Francis karong tuiga sumala pa sa Holy See. Miabot matud pa og susamang kantidad gumikan gipaayo ang Sistine Chapel alang sa deliberasyon.
Lakip sab sa gipaayo ang St. Peter’s Square aron sugaton ang libuan ka mga deboto ug turista nga nag-atang sa puti nga aso nga maoy senyales nga nakapili na og bag-ong santo papa.
Ilawom sa kasabutan niadtong 1929 nga maoy nagmugna sa Vatican City State, ang gobyerno sa Italya ang niabaga sa seguridad.
Gani, niadtong 2013 nga conclave, miabot matud pa sa €4.5 million, katugbang sa P280 million ang nagasto alang sa seguridad ug transportasyon sigon ni kanhing Rome Mayor Gianni Alemanno.
Karong tuiga, nakagasto na ang gobyerno sa Rome og €5 million human sa nahimong kamatayon ni Pope Francis sigon sa civil protection minister nga si Nello Musumeci.
Sa homiliya ni Cardinal Giovanni Re, Dean sa College of Cardinals, iyang gipasabot ang kahulugan sa panaghiusa sa Simbahan.
Dugang pa niya nga Ang panaghiusa sa Simbahan kabubut-on ni Cristo nga dili kini nagpasabot og pagkatibulaag, kundi alang sa lig-on nga pakighiusa sa nagkalainlain basta magpabilin ang pagka matinud-anon sa Ebanghelyo.
Ang seremonyas nagtapos pinaagi sa katapusang antiphon nga gihalad kang Birhen Maria, ug human niini, ang mga kardinal migawas na sa basilica aron magpahulay, mangaon sa paniudto, ug magpamalandong sa ilang tagsa-tagsa, sa dili pa magsugod ang konklave sa Sistine Chapel.