MALAYBALAY CITY – Gisugdan na ang pagtanggal sa mga campaign materials sa mga kadalanan ug ubang pampublikong lugar sa siyudad sa Malaybalay.
Sumala ni Atty. Danilo Dividina, Election Officer sa Comelec Malaybalay atol sa eksklusibong pakighinabi sa Bombo Radyo Malaybalay. Ang maong lakang kabahin sa usa ka inisyatibo nga gitawag oplan baklas”, nga nagtumong sa pagpadayon sa kalimpyo ug kalinaw sa siyudad human sa eleksyon.
Ang maong kalihukan gisugdan kagahapon, diin gipaningkamotan nga limpyohan ang mga lugar nga gibutangan og campaign posters, tarpaulins, ug uban pang materyales nga gigamit sa kampanya sa mga kandidato. Gikuhaan og prioridad ang mga designated posting areas sa barangay, mga poste sa kadalanan, ug uban pang pampublikong lugar nga gipatungan sa mga campaign materials.
Ang operasyon sa Oplan Baklas gipasiugdahan sa Department of Public Works and Highways (DPWH) ug sa Local Government Unit (LGU) sa Malaybalay uban sa suporta sa mga katawhan ug mga kandidato. Giawhag ni Atty. Dividina ang tanang mga nitambong sa eleksyon kandidato man o supporter nga motabang sa maong kalihukan isip pakigpakabana sa kahapsay ug kahinlo sa siyudad Gilauman nga pinaagi sa koordinasyon ug panaghiusa sa tanang sektor, mahimong limpyo ug malinawon ang Malaybalay human sa kasikas sa eleksyon.