Gipasalig sa militar nga wala na’y kapasidad ang mga nahibiling miyembro sa New People’s Army (NPA) sa paglusad og bisan unsang teroristang aksyon sa probinsya sa Bukidnon.
Sa eksklusibong pakighinabi sa Bombo Radyo Malaybalay kang Brigadier General Seigfred C. Tubalado, Commander sa 403rd Infantry “Peacemaker” Brigade, iyang gibutyag nga kapin duha na ka tuig nga walay natala nga pagpangatake o hulga gikan sa rebeldeng grupo. Sumala ni Gen. Tubalado, ang mga nahibiling sakop sa maong pundok nagtago-tago na lamang karon sa kalasangan sa Pantaron Range, partikular na sa utlanan sa Bukidnon, Surigao del Sur, ug Agusan del Sur.
Bisan pa man niini, gipahigayon gihapon ang 24/7 nga pagbantay sa kasundalohan ug kapulisan aron masiguro nga dili makalusot ang bisan unsang hulga, ilabina sa mga soft targets ug sa panahon sa dagkong panagtapok sama sa nagsingabot nga Semana Santa.
Sa pagkakaron, gipadayag sa militar nga nagpadayon na ang proseso aron hingpit nga ideklarar ang Bukidnon isip “insurgency-free.” Kauban niini ang padayon nga panawagan ngadto sa mga nahibiling rebelde nga mobalik na sa sabakan sa balaod ug mopahimulos sa mga suporta sa gobyerno alang sa ilang malinawong panginabuhi.