Gibaligya sa NFA Bukidnon pinaagi sa pag auction sa ilang mga aging stocks sa bugas ngadto sa mga private millers ug traders.
Kini ang gibutyag ni Glenn De Otoy,Information Officer sa NFA Bukidnon atol sa eksclusibong pakighinabi niini sa Bombo Radyo, ang maong mga bugas nag-edad na og tulo hangtod 18 ka bulan.
Saysay pa niini nga bisan tuod og “aging” na kini, anaa pa kini sa maayong kondisyon ug luwas nga kan-on sa publiko.Tumong sa maong auction nga makakuha og dugang pondo ang ahensya alang sa ilang mga operational activities, sama sa dugang nga milling ug pagpaayo sa mga drying facilities. Gawas niini, gihimo usab ang lakang aron ma-decongest o malugakan ang mga bodega sa NFA sa probinsya.
Nasayran nga ang maong mga bugas gi-offer na kaniadto sa mga ahensya sa gobyerno sama sa DSWD, BJMP ug mga Local Government Units (LGUs) alang sa ilang relief operations, apan tungod kay duna pa silay igong supply, gi-ablihan na kini alang sa mga private traders.
Gibaligya ang maong bugas sa auction price nga ₱28 matag kilo. Hinuon, giklaro ni De Otoy nga kung mabaligya na kini sa mga private traders, dili na kontrolado sa NFA ang presyo niini sa merkado, ilabi na kung pilion sa mga negosyante nga i-remill o i-polish pag-ayo ang bugas.Kasamtangan, gipasalig sa NFA-Bukidnon nga pabilin nga lig-on ug igo ang supply sa bugas sa probinsya alang sa bisan unsang emerhensya o kalamidad.