Napaskahan na og kaso ang usa ka High Value Individual (HVI) nga nakuhaan og kapin ₱1.3 milyon nga kantidad sa gituohang shabu atol sa anti-illegal drug operation sa Purok 3, Barangay Kinura, Kalilangan, Bukidnon, kagahapong adlawa, Hulyo 22, alas 12:40 sa kaadlawon.
Sa pakighinabi sa Bombo Radyo Malaybalay, gibutyag ni PMaj. Jayvee Babaan, tagpamaba sa Bukidnon Provincial Police Office, nga nasikop ang 41-anyos nga lalaki nga giilang si alyas “Niel,” residente sa Zone 10, Bulua, Cagayan de Oro City. Nakuhaan kini og 200.9 gramos sa gituohang shabu nga gibanabana og kantidad nga ₱1,366,120.00.
Nag-atubang na kini karon sa kasong paglapas sa Republic Act 9165 o Comprehensive Dangerous Drugs Act of 2002. Kasamtangang anaasa kustodiya sa kapulisan ang suspetsado samtang giandam ang dokumentasyon ug tukmang legal nga proseso aron mapanubag siya sa balaod batok sa iligal nga droga.