Nakahaya na karon sa ilang panimalay sa Purok 6, Poblacion, Impasug-ong, Bukidnon ang babayeng backrider nga namatay human malabay sa kanal sa motorsiklo nga nadisgrasya sa Sayre Highway, Purok 1, Barangay Aglayan, alas 5:00 sa buntag, Hulyo 5, 2025.
Gikumpirma sa Malaybalay City Police Station nga mibuto ang atubangan nga ligid sa motorsiklo, hinungdan nga nawad-an og kontrol ang drayber nga giilang uyab niini ug natumba kini.
Nalabay sa kanal ang biktima nga 28 anyos ug didto naangol pag-ayo. Daling gidala ang biktima ug ang iyang uyab nga drayber, 27 anyos ug taga-Manolo Fortich, sa balay tambalan, apan gideklarang dead on arrival ang babaye.
Ang drayber kasamtangang na-confine pa sa tambalanan. Gipahibalo nga anaa sa kustodiya sa Malaybalay PNP ang motorsiklo samtang padayon ang imbestigasyon sa hinungdan sa insidente.