Nagpagula ang World Health Organization (WHO) sa ika 59 nga report kalabot sa padayon nga multi-country outbreak sa monkeypox o Mpox, nga nagpakita sa padayon nga pagkalat sa virus sa nagkalain laing parte sa kalibutan.
Sumala sa WHO, miabot sa 3,135 ka kumpirmadong kaso ug 12 ang namatay sa miaging bulan sa Setyembre.
Kapin 80 porsiyento sa mga kaso gikan sa rehiyon sa Africa.Kasamtangan, 17 ka mga nasud sa Africa ang adunay aktibong transmisyon sa virus, lakip na ang Democratic Republic of the Congo, Liberia, Kenya, ug Ghana.
Natala usab ang unang kaso sa clade Ib MPXV sa Malaysia, Namibia, Netherlands, Portugal, ug Spain, samtang adunay lokal Transmission sa unom ka mga nasud gawas sa Africa.
Bisan pa man sa pagtaas sa kaso sa pipila ka rehiyon, gipahayag sa WHO nga ubos gihapon ang risgo sa kinatibuk-ang populasyon.