Pipila ka mga residente sa Barangay Patpat, Malaybalay City ang nagreklamo tungod sa nasinati nga baho sa hugaw sa baboy matag adlaw nga gitumbok nga nagagikan sa mga poultry ug baboyan sa palibot sa barangay.
Sa pakighinabi sa Bombo Radyo Malaybalay kay Brgy. Kapitan Renante Okit nga ilang gipaabot na ang maong isyu ngadto sa opisina sa CENRO aron ma-imbestigahan. Migamit na matud pa ug drone ang CENRO aron ma-inspeksyon ang lugar ug masuta kung asa gayud gikan ang baho.Usa sa mga gilantaw nga hinungdan mao ang Farm Crest Ventures Inc., apan matud pa ni Kapitan Okit, nakahinabi siya sa representante sa kompanya nga misalikway sa pasangil.
Giangkon sa kompanya nga dili gikan sa ila ang baho, kondili sa silangang bahin diin adunay nagapamuhi og baboy.Nagpadayon ang imbestigasyon sa mga otoridad aron matino gyud kung kinsa ang responsable sa baho nga nakaapekto sa panginabuhi sa mga residente. Nanghinaut ang katawhan nga mahatagan dayon og solusyon ang maong problema.