Gipadayag ni Department of Public Works and High Ways Secretary Vince Dizon nga luwas ug giprotektahan ang tanang dokumento nga may kalabotan sa imbestigasyon sa korapsyon sa mga flood control projects. Matod ni Dizon, anaa na kini nga mga dokumento sa DPWH Central Office sa Manila ug dili apektado sa sunog nga nahitabo sa DPWH-Bureau of Research Standards sa Quezon City.
Gipasabot sa kalihim nga nakolekta na nila ang mga dokumento gikan sa tuig 2022 hangtod 2025, ug padayon pa silang nagadawat sa mas karaang mga impormasyon. Subay sa inisyal nga imbestigasyon sa Bureau of Fire Protection, gibutyag ni Dizon nga walay bisan usa nga dokumento nga konektado sa flood control anomaly ang nadamay sa maong insidente.
Sa laing bahin nasuta na sa Bureau of Fire Protection (BFP) ang hinungdan sa sunog nga nahitabo sa Department of Public Works and Highways (DPWH) Bureau of Research and Standards sa Quezon City, kagahapong adlawa, Miyerkules sa hapon. Sumala sa BFP National Capital Region, ang maong sunog resulta sa short-circuit nga naggikan sa kisame sa Records Section nga nahimutang sa ikatulong andana sa maong building.
Apan, gilamdagan usab sa BFP nga nagpadayon pa ang ilahang lawom nga imbestigasyon bahin sa insidente. Sa sinugdanan, gipahayag sa DPWH nga gikan kini sa nasunog nga computer sa Materials Testing Division ang hinungdan sa kalayo. Gipasalig usab sa DPWH nga wala’y nadamay nga mga importante nga dokumento nga may kalabotan sa flood control projects anomalies. Kahinumduman nga misugod ang sunog bandang alas-12:30 sa udto, nga gitaasan pa sa ikatulong alarma, ug napalong kini ala -1:49 sa hapon.