Giingon nga andam na ang mga atleta sa Malaybalay City alang sa umaabot nga Northern Mindanao Regional Athletic Association o NMRAA 2026 nga pagahimoon sa maong dakbayan.
Sumala kang Al Adrian Antipasado, nagsugod na sa ilang pagpangandam ang mga atleta sukad pa sa miaging tuig ug adunay partisipante ang dakbayan sa kadaghanang sporting events nga gi-offer sa regional meet.
Matud niini, naghatag usab og suporta ang lokal nga panggamhanan sa Malaybalay, lakip ang opisina sa mayor ug ang Department of Education, aron matabangan ang preparasyon sa mga atleta.
Dugang pa ni Antipasado nga usa sa hagit nga giatubang sa mga atleta ang pressure sa pagdula sa ilang home city, ilabina kay ang mga manan-aw mao ang ilang mga paryente ug kaila.
Bisan pa niini, nagpabilin nga kompyansa ang city sports office nga makakuha og daghang medalya ang Malaybalay samtang ginabansay sa mga DepEd teachers nga nagsilbing coaches ang mga atleta alang sa maong kompetisyon.