Tulo ka sunod-sunod nga aksidente sa kadalanan ang natala sa probinsya sa Bukidnon sulod lamang sa usa ka adlaw niadtong Marso 28, ning kasamtangang tuig, diin usa ka menor de edad ang nakabsan sa kinabuhi human mibangga ang gimanehoang motorsiklo sa usa ka van truck sa lungsod sa Impasugong.
Samtang sa dakbayan sa Valencia, duha usab ka managlahing insidente sa disgrasya ang nahitabo sa Barangay Bagonta-as ug Barangay Mabuhay nga naggumikan sa sayop nga pagmaniobra ug pagliko sa mga drayber sa truck ug motorsiklo.
Miabot sa pito ka mga indibidwal ang dinalian nga gidala sa nagkalain-laing ospital human makaangkon og seryosong samad sa kalawasan tungod sa kakusog nga impact sa maong mga panagbangga.
Matud ni PCOL Oliver Sotto Navales, kasamtangang anaa sa kustodiya sa kapulisan ang mga drayber nga nalambigit alang sa dugang imbestigasyon ug hustong disposisyon sa kaso.
Nanawagan usab karun ang kapulisan sa tanang mga motorista nga magbinantayon ug mosunod sa balaod trapiko aron malikayan ang susamang trahedya sa kadalanan.