Patay ang driver sa usa ka motorsiklo human mabanggaan sa usa ka bongo nga sakyanan ang gimanehoang motorsiklo niini pasado alas 2:10 sa hapon, Enero 11, sa Purok-5, Barangay San Jose, Malaybalay City, Bukidnon. Ang biktima giilang si alyas John, 16 anyos, residente sa P-14 Gabunan, Barangay Casisang Malaybalay City.
Sa imbestigasyon nga gihimo, nasayran nga ang motorsiklo misulay pagtabok sa kalsada, gikan sa south bound side, paingon sa north bound side sa atbang nga direksyon, apan pag-abot sa lugar nga nahitaboan sa inner lane sa maong kalsada aksidente kining nadasmagan sa atubangang bahin sa usa Bongo nga gikan sa Omagro, Cagayan paingon sa habagatanng direksyon.
Tungod sa kusog nga impak ang motorsiklo nalagpot ug napaingun sa kanal nga bahin ug napasok ilawom sa tulay-tulay diin nakaangkon ug mga bun-og sa kalawasan ug daling gidala sa Bukidnon Provincial Medical Center aron matambalan apan subo gumikan nakabsan kini sa iyang hinanaling kinabuhi human sa pipila ka mga minuto ang milabay.
Sa pagkakaron, nagkaatubangay na sa Malaybalay City Police Station ang duha ka banay sa pamilya ug matud pa nagkasinabot na kini.