Nanawagan ang Malacañang Palace sa publiko nga likayan ang panic buying taliwala sa nagpadayong tensyon sa Middle East nga nakaapekto sa produktong presyo sa petrolyo sa tibuok kalibutan.
Matud ni Malacañang Palace Press Officer Undersecretary Claire Castro, nagpahinumdom ang gobyerno sa mga Pilipino nga magpabiling kalmado ug dili magpalit og sobra nga suplay sa gasolina ug mga batakang panginahanglan tungod sa kahadlok sa posibleng kakulang.
Sigon ni USec. Castro, nga base sa monitoring sa Department of Energy ug Department of Trade and Industry, igo pa ang suplay sa petrolyo ug mga essential goods sa Philippines aron matubag ang panginahanglan sa merkado.
Gipasabot usab niini, nga ang panic buying mahimong hinungdan sa artipisyal nga kakulang sa suplay ug mosangpot sa dili kinahanglan nga pagsaka sa presyo sa merkado.
Subay niini, giawhag sa Palasyo ang publiko nga magpalit lamang sumala sa tinuod nga panginahanglan aron mapadayon ang hapsay nga distribusyon sa mga produkto.
Samtang nagpadayon ang tensyon sa Middle East nga nakaapekto sa global oil market, gipasalig ni Castro nga nagpadayon ang gobyerno sa pagmonitor sa sitwasyon ug pagkoordinar sa mga ahensya aron maprotektahan ang mga konsumidor batok sa posibleng hoarding, profiteering ug dili makatarunganong pagtaas sa presyo.