Gi-abrihan na ang oportunidad alang sa mga early-career health researchers sa Northern Mindanao nga makadawat og grant nga nagkantidad ug P100,000 alang sa ilang mga research proposal, pinaagi sa usa ka panag-uban nga programa sa Department of Health – Center for Health Development Northern Mindanao (DOH CHD-NM) ug sa Department of Science and Technology – Region X (DOST-X).
Ang maong pondo ilawom sa 2025 Call for Health Proposals gituyo aron masuportahan ang mga bag-ong researcher nga miyembro sa Northern Mindanao Consortium for Health Research and Development (NorMinCoHRD). Sa kinatibuk-an, P600,000 ang giandam nga pondo, diin hangtud sa P100,000 ang matag proyekto nga mamahimong mapili nga makadawat niini.
Gitumong kini nga programa aron mapalambo ang kahibalo ug solusyon sa mga isyu sa panglawas sa rehiyon. Gihangyo ang mga kwalipikadong aplikante nga motambong sa orientation ug magpasa sa ilang mga programa sulod sa gihatag nga deadline.