Nagpahibalo si House Majority Leader Ferdinand Alexander “Sandro” Marcos sa iyang pormal nga pag-inhibit gikan sa tanang diskusyon, deliberasyon, ug proseso sa House Committee on Rules may kalabotan sa gipasakang impeachment complaint batok kang Presidente Ferdinand R. Marcos Jr.
Sumala sa maong mambabalaod, ang iyang desisyon dili tungod sa legal nga obligasyon, kondili bunga sa mas taas nga katungdanan nga panalipdan ang integridad sa Kamara, ang kredibilidad sa mga proseso niini, ug ang pagsalig sa publiko sa sistemang konstitusyonal.
Bisan pa nga dili siya obligado sa House Rules nga mag-inhibit, gipasiugda ni Marcos nga ang pagpangulo usahay nagkinahanglan og pagpugong sa kaugalingon imbes nga aktibong pag-apil, ilabi na sa mga panahong ginasulayan ang institusyon.
Dugang pa niini, ang iyang paglikay sa maong proseso makatabang aron malikayan ang bisan unsang pagduda, obhetibo, ug lehitimo sa maong lakang.
Gipasiugda usab niya nga kini nga buhat dili paglikay sa responsibilidad, kondili usa ka paagi sa pagpalig-on sa pagsalig sa gobyerno.
Bisan pa sa iyang pag-inhibit, nagpabilin siyang matinud-anon sa iyang katungdanan isip House Majority Leader sa tanang uban pang mga isyu, ug siya adunay hingpit nga pagsalig nga ang Kamara molihok uban ang kagawasan, ug pagkamatinud-anon sa Konstitusyon.