Padayon nga nagpaalim sa balay tambalanan ang usa ka mag-uuma nga biktima sa pagpamusil nga nahitabo sa Barangay Halapitan, San Fernando, Bukidnon, kagabii, Oktubre 12, 2025.
Sa pakighinabi sa Bombo Radyo Malaybalay kang PSMS. Arse Balamad Segura, sa San Fernando Municipal Police Station, nakadawat ang buhatan og tawag sa cellphone gikan sa usa ka concerned citizen nga nagreport sa maong pagpamusil.
Ang biktima nga si alias “Cadoy”, 31 anyos, adunay live-in partner, usa ka mag-uuma, ug residente sa Purok 10,Nakabuklad, San Fernando, Bukidnon.
Matud ni PSMS. Segura, samtang anaa sa balay sa iyang ugangan ang biktima, kalit nga mitungha ang suspek nga si alias Jupiter Vergara Lapao, 45 anyos, ug gipusil si alias “Cadoy”gamit ang usa ka kalibre 12 nga pusil. Human sa pagpamusil, dali kining mitakas paingon sa wala mailhing direksiyon.
Gituohan sa kapulisan nga selos ang hinungdan sa insidente, sanglit parehong nakainom ang biktima ug ang suspek sa dihang nahitabo ang pagpamusil.
Samtang, sa alas 10:15 sa gabii, subling nakadawat og laing tawag ang kapulisan nga nakita ang suspek sa Sitio Mahayag, Barangay Nakabuklad, San Fernando.
Dali kining gitumbok sa mga otoridad, ug human sa pipila ka minutos, boluntaryong misurender ang suspek apan wala nagdala sa armas nga gigamit.
Kasamtanagng anaa na sa kustodiya sa San Fernando Municipal Police Station ang suspek samtang giandam na ang kaso nga “Frustrated Murder” batok kaniya.