Gipaningkamotan karon sa opisyales sa lokal nga kagamhanan sa syudad sa Malaybalay nga mapalabang ang gisugyot nga ordinansa alang sa pagtukod og community college sa maong syudad.
Sa eksklusibong pakighinabi sa Bombo Radyo Malaybalay kang Konsehal Niko Aldeguer, gipadayag niini nga ang ordinansang giduso naglakip sa appropriation o paggahin og pundo alang sa city colleges, nga gitumong sa pagtukod og kaugalingong kolehiyo pinaagi sa pagdumala sa lokal nga kagamhanan sa syudad sa Malaybalay.
Matud pa ni Aldeguer, tumong sa maong inisyatiba nga makahatag og mas lapad ug kahigayunan sa edukasyon alang sa mga kabatan-onan, hilabi na kadtong mga estudyanteng adunay pinansyal nga kakulangan ug sa naglisod sa pagpasar sa mga entrance examination sa uban nga unibersidad.
Pinaagi sa gisugyot nga balaodnon, gilauman nga makahatag ang lokal nga kagamhanan og alternatibong institusyon nga magtanyag og kalidad nga edukasyon nga mas abot sa panginahanglan sa mga residente sa syudad.
Sa kasamtangan, ang maong sugyot nga ordinansa anaa pa sa committee level ug padayon pang ginahisgutan alang sa dugang nga pagtuon ug konsultasyon sa mga adunay kalabutan nga sektor sa komunidad.