Nagpadayon ang programa nga “Libre Sakay” sa dakbayan sa Malaybalay taliwala sa mga reklamo sa pipila ka drayber. Sumala ni Konsehal Jayson Chad Ayala, ang maong programa gidesinyo aron makatabang sa mga commuter nga dili kaayo makaapekto sa panginabuhian sa mga pampublikong sakyanan.
Gipasabot ni Ayala nga duna’y mga regulasyon ang “Libre Sakay” sama sa pagdili sa paghunong sa mga yellow box aron dili direktang makig-kompetensya sa mga motorila ug multicab. Bisan pa niini, giila sa konsehal ang mulo sa mga drayber sama ni alyas “Noy” bahin sa kaminansan sa kita tungod sa mahal nga presyo sa lana.
Sa pagkakaron, ang 10th Sangguniang Panlungsod nagtuon na sa usa ka “win-win solution” o malungtarong pamaagi. Lakip niini ang posibleng automatic fare matrix adjustment aron daling makasabay ang pletehan matag adunay fuel price increase.
Gipasiugda ni Ayala nga walay pondo sa gobyerno ang gigasto sa kasamtangang programa tungod kay personal nga sweldo nila ni Mayor Jay Warren Pabillaran ang gigamit sa abang ug krudo. Gilauman nga magpagawas og dugang update ang city government human sa ilang sunod nga sesyon sulod niining semanaha.