Gipadalhan og show cause order sa Land Transportation Office (LTO) Region 6 ang usa ka lalaki nga nalambigit sa viral video diin makita siyang nagsayaw samtang nagatindog ibabaw sa nagdagan nga tricycle ug nag-brief lamang, sa syudad sa Iloilo.
Natigayun ang maong insidente sa Diversion Road may sa Mandurriao, diin ang lalaki nagsul-ob pa og helmet samtang gihimo ang peligroso nga lihok.
Ang maong aksyon gikasuk-an ni LTO Region 6 Director Atty. Guidioso Geduspan II, gumikan delikado kini dili lamang alang sa maong lalaki apan ilabi na sa ubang motorista.
Matud sa opisyal, ang maong lihok wala nagpakita og responsableng pamatasan sa karsada ug posible pa nga mosangpot sa aksidente.
Gikompirma usab nga giinspirasyon sa lalaki ang usa ka viral video sa social media diin ang usa ka Indonesian teenager nagpasundayag og sayaw sa unahan nga bahin sa dragon boat atol sa lumba.
Ang maong “aura farming” nga sayaw nisikat una sa mga social media reels ug daghang kabatan-onan ang misunod niini nga trend, gamit ang lain-laing sakyanan sama sa jeep, racing car, kotse, ug karon, tricycle.