Nakatingkagol na sa selda ang tulo ka lalaki human nila gidunggab ug gikulata ang usa ka 47-anyos nga lalaki nga giingong “nagmaoy” samtang armado og kutsilyo sa usa ka selebrasyon sa Sitio Pangantapan, Brgy. Tumaras, Kibawe, niadtong milabayng adlaw.
Sumala sa report sa kapulisan, ang biktima nga taga-Tagoloan, Misamis Oriental, nahubog ug naghimog kasamok sulod sa panimalay nga nagsaulog og pista ug bunyag. Tungod sa kahadlok sa mga bata sa dapit, gigukod sa mga suspek ang biktima gamit ang sugnod ug mga bato.
Sa dihang naapsan, nailog sa usa sa mga suspek ang hunting knife sa biktima ug gigamit kini sa pagdunggab kaniya, samtang ang laing duha ka suspek nibunal kaniya og kahoy ug bato sa ulo ug lawas. Narekober sa crime scene ang usa ka bato nga dunay dugo, sugnod, ug ang kutsilyo nga nabilin pa sa lawas sa biktima.
Nakaangkon og upat ka samad-dinunggaban ug grabeng samad sa ulo ang biktima kinsa kasamtangang giobserbahan sa tambalanan. Nadakpan sa responding team ang tulo ka mga suspek nga anaa na karon sa kustodiya sa Kibawe Municipal Police Station alang sa saktong disposisyon ug pagpasaka og tukmang kaso.