Gipahibalo ni House Justice Committee chairperson ug Batangas Rep. Gerville Luistro nga mahimo pa gihapon magsumite og dugang impeachment complaint batok kang VP Sara Duterte.
Mahimo kini samtang wala pa isumite sa House plenary ang duha ka impeachment complaint sa iyang komite.
Sa usa ka panayam, gipangutana si Luistro bahin sa posibilidad nga adunay bag-ong reklamo batok sa Bise Presidente nga posibleng isumite sa Lunes, Pebrero 9, pila ka adlaw human isumite sa House Secretary General ang duha ka reklamo sa Office of the Speaker.
Matud pa sa mambabalaod, hangtod wala pa nasumite sa iyang komite ang mga reklamo, pwede gihapon kini dawaton sa Kamara gumikan wala pa magsugod ang one-year prohibition period.
Makompleto ang proseso sa pagsugod sa kaso kung mairefer na kini sa Justice Committee, ug sa adlaw nga marefer kini, magsugod na ang ban.
Sa ilawom sa House Rules, adunay 10 session days ang Office of the Speaker aron isulod ang reklamo sa Order of Business.
Kung mahitabo kini, kinahanglan usab mairefer ang reklamo sa Justice panel sulod sa tulo ka session days.
Gipahayag usab ni Luistro nga posible nga masuportahan sa labaw sa 1/3 sa mga miyembro sa Kamara ang dugang reklamo aron mapadali ang proseso, sama sa nahitabo sa 2025 complaint batok sa VP Sara.
Apan, kinahanglan kini mahitabo sa dili pa mairefer sa iyang komite ang duha ka nauna nga reklamo nga anaa pa sa opisina ni Speaker Faustino Dy.